Nag ginamo kag wala madayon ang 1st trip sang libre sakay nga gin lunsar sang Local Government Unit sang Bacolod bangud sang pag pamalabag sang mga Tricycle Drivers kag Operators sa Progreso Village, Barangay Vista Alegre, syudad sang Bacolod sini nga aga Mayo 15.
Suno sa presidente sang 120 tanan ka drivers kag operators sang asosasyon Carlos gin siling sini, indi gid sila mag halin sa lugar agud ipakita sa gobyerno ang ila pagpamatuk sa pag beyahe sang modernized electronic jeep sa lugar bangud mangin maka luluoy ang ila kahimtangan kay apiktado gid ang ila income.
Dugang pa sang Presidente, gina kwestyon nila ang proseso sang pagpasulod sang E-jeep sa lugar bangud wala sang public consultations sa pumuluyo kag sa ila asosasyon.
Sa interview sang Tira Brigada kay Bacolod City Traffic Authority Office Head Patrick Lacson gin paathag sini, ang libre sakay yara palang sa experimental stage bilang kabahin sang City Ordinance 338 sa diin ini naga hatag sang ligwa agud magbukas sang bag-o nga rota sa idalum sang jeepney modernization program nga para sa benipisyo sang pumuluyo.