Gihagit karon sa usa ka myembro sa United Church of Christ in the Philippines (UCCP) ang ilang mga kadagkuan sa simbahan nga isalikway ang New People’s Army kon NPA dungan sa pagkondena sa krimen nga nahimo sa rebeldeng grupo.
Sumala sa pahayag sa usa ka Dio Raphael Ratunil, dayag ang pagkontra sa kadagkuan sa maong simbahan sa matud pa extrajudicial killings apan tak-om ug walay pahayag-pagkondena sa gihatud nga kagubot ug krimen nga hinimuan sa NPA.
Boot sa nahisgutan nga mapaklaro sa church leaders nga walay supurtang pinansyal nga nakuha ang walhong kalihukan gikan sa ilang simbahan lakip na usab ang paggamit sa mga tithes gikan sa mga myembro aron mawagtang ang pagdusa sa sama niya nga dunay daghang pangutana.
Ang hagit ni Ratunil nunot sa gipagawas nga pahayag sa UCCP nga hugot nagkondena sa mga dagkong isyu nga gisagubang sa estado sa Pilipinas sama sa korapsyon, kapobrihon, inhustisya, ug pagpanglupig apan dili makasulti og prangka batok sa NPA ug ilhon ang grupo nga maoy nagpasiugda sa daghang kagubot ug suliran sa komunidad.
Kahibaluang usa ang UCCP-Haran sa may Father Selga Street ning syudad ang nagsilbing taguanan sa mga rebelde, aktibista ug mga CPP-NPA recruiters nga pinangita sa balaud kauban sa mga lumad gikan sa Talaingod Davao del Norte nga ilang naila.
Ang mga UCCP-Haran administrators nga gipangunahan ni Bishop Hamuel Tequia, Rev. Daniel Palicte ug uban pang personalidad ang unang gipakanaugan og warrant of arrst niadtong milabayng bulan sa Abril karong tuiga tungod sa kasong RA 7610- Special Protection of Children against Child Abuse, Exploitation and Discrimination Act or Anti-Child Abuse Law. BNFM-DAVAO
