Subling giklaro sa Department of Health (DOH) XI nga wala pa karon girekomenda sa mga vaccine experts sa nasud ang booster shots sa bisan unsang COVID-19 vaccine.
Sumala kang DOH XI Local Health Support Division Chief Dr. Raquel Montejo, tanang brand sa bakuna nga gigamit karon ang pulos naghupot og Emergency Utilization Authority (EUA) o pabiling anaa pa sa Phase 3 clinical trials.
Saysay sa opisyal nga nagpadayon ang ginahimong
long-term follow-up studies kung asa ang mga nabakunahan ang imonitor sulod sa duha hangtud tulo ka tuig ug nagpasabot kini nga wala pa sab nakab-ot ang complete clinical trial result busa wala pa girekomenda ang booster shots.
Una niini subay sa public advisory sa milabayng semana nga nasayop matud pa og sabot ang kadaghanan sa gibuhiang pahayag sa Vaccine Expert Panel nga si Dr. Nina Gloriani, giklaro sa DOH ang impormasyon kabahin sa gitas-on kon gidugayon sa proteksyon sa bakuna sa usa ka tawo.
Gitino nga muubos ang antibodies gikan sa bakuna base sa follow-up gikan sa mga participants sa clinical trials. BNFM-DAVAO
