DAKO ang matabang sa kapulisan sa Tupi municipal police station sa imbestigasyon sa pagpamusil sa upat ka tawo sa purok Darusalam, Barangay Bawing, GenSan.
Kini ang gibutyag ni PMaj. Ananiaz Vasquez, hepe sa Tambler police station nga mas maayo nga makig-alayun sila sa Tupi PNP tungod taga Palian, Tupi ang mga biktima, asa duha ang namatay sa ospital ug duha ang nakaangkon og tapsing nga samad sa bala.
Ang mga biktima gikan sa pagpangaligo sa beach resort sa Maasim ug dihang miabot sa purok Darusalam, usa ka motorsiklo nga Rouser ang mitapad sa gisakyan nga pick up sa mga biktima ug didto gipamusil, alas 2:30 sa hapon, Dominggo.
Matud ni Vasquez, posibleng gisundan ang mga biktima asa may testigo usab nga nakakita sa insidente, miasoy nga walay tabon ang driver sa gisakyan sa namusil.
Sa himuong background investigation sa mga pamilya sa mga biktima sa Tupi, posibleng mailhan ang identity sa mga suspek aron masayran ang motibo sa krimen.
Nasayran nga walo ka basiyo sa kalibre .45 nga armas ang nakaplagan sa crime scene.
