Tungod sa kawad-on, lalaki, gi-unay og kawat ang cellphone sa iyang amigo

Nagtingkagol sa Mabolo Police Station ang usa ka lalaki ug ang iyang  hinigugma human giingong nangawat og cellphone sa iyang higala kaganihang ala una sa kaadlawon, Hunyo 19, 2024 sa Generoso St. sa barangay Apas sa dakbayan sa  Sugbo.

Giila ang mga dinakpan nga sila si Adolfo Ragas, 28 anyos, walay trabaho ug Mariel Ann Tañega, 24 anyos, wala usab trabaho, pulos mga residente sa nahisgutang barangay.

Ang biktima mao si Edan Arevalo, 25 anyos.

Sa pakighinabi sa Brigada News FM Cebu sa suspek nga si Ragas, gibutyag niini nga plano lang unta nila nga molaag kuyog ang iyang uyab tungod kay nag-celebrate kini sa iyang birthday kagahapon.

Giingong kaganihang ala una sa kaadlawon, nakahuna-huna sila sa iyang uyab nga molaag sa iyang barkada, apan giingong natulog na kini.

Matud niini nga tungod sa kawad-on, natintal siya sa pagkuha sa cellphone sa iyang barkada nga gibutang sa lamesa, kilid sa gihigdaan niini.

Hinuon, gi-klaro niini nga walay kalabutan ang iyang uyab sa iyang gihimo gani giingong wala kini’y kasayuran sa iyang gihimong pagpangawat.

Leave a Reply

Your email address will not be published. Required fields are marked *