LEGAZPI CITY – Padagos an monitoring na pigsasagibo kan Department of Health Bicol mapadapit sa mga kaso nin COVID-19 sa Bicol Region. Sa nakalihis na semana, Hulyo 21-27, tulong kaso an nairehistro sa probinsya kan Albay.
Sa datos kan DOH Bicol, katumbas ini ki 27.27%, kun sain duwa an nairehistro sa Tiwi asin saro sa Daraga, alagad, wara ki naireport na naka-recover sa probinsya.
Sa kabilugan, 11 kaso an naidugang sa bilog na rehiyon sa pinakaultimong datos kan DOH Bicol. Padagos man an pagirumdom kan ahensya na manteniron an kalinigan asin magkaigwa ni healthy lifestyle nganing maibetaran an anuman na klase nin helang.
