Gilamoy sa kusog nga kalayo ang tulo ka gambalay sa Claveria St., Brgy 35-D ning syudad, pasado alas 6:00 sa buntag, Mayo 31, 2024.
Sa inisyal nga imbestigasyon sa kapulisan, nagsugod ang kalayo sa abandonado nga New Davao Theater nga gipatung-an sa gi-abandona usab nga Davao Hotel ug Davao Electronic Center nga nalakip sa pagkasunog.
Miresponde gilayon sa lugar ang personahe sa kabomberohan, Brgy fire fighter volunteers ug Central 911 fire Auxiliaries.
Sa pagpanubay sa Brigada, nasuta nga nagtinabangay ang mga fire fighters sa pagpakgang sa kalayo pinaagi sa paggamit og duha ka fire truck ladder aron mapasiritan og tubig ang sa taas nga bahin sa maong building ingun man ang sa tunga nga bahin.
Nakontrolar ang maong sunog alas 10:00 na sa buntag, diin walay natalang nasamdan o casualties. Padayon pa sab nga ginasuta sa kabomberohan ang hinungdan sa sunog ug ang nahimong damyos niini.
