PATAY ang usa ka batan-on human nalambigit sa bangga ang gisakyan niining Toyota Fortuner sa Crossing Sulit, Purok 8, Barangay Sulit, Polomolok South Cotabato, Miyerkules sa hapon.
Giila ni Police Lt. Virlen Pampolina hepe sa Polomolok Police station ang namatay mao Saydin Aliman, 15-anyos, taga Poblacion Tumbao, Mangudadatu, Maguindanao.
Gibutyag sa hepe nga gikan sa Koronadal City ang Fortuner nga gimaneho ni Jihayr Mabinay padulong na unta kini sa Gensan.
Apan pag-abot sa Crossing Sulit, kalit kining nabangga sa Truck bus nga gimaneho ni Rey Samontanes taga Brgy Polo, Polomolok South Cotabato.
Tungod sa kakusog sa impact nadugmok ang likod nga bahin sa fortuner samtang naguba usab ang atubangan sa truck bus.
Giangkon ni Samontanes driver sa truck bus nga wala siya nakainom dihang nagmaneho aron ihatod ang mga trabahante sa DOLE nga iyang angkas.
Sa kasamtangan anaa sa kustodiya sa Polomolok Police station si Samontanes ug naghulat sa mahimong desisyon sa kapulisan. I Enamie Mogpon
