PATAY ang trisikad driver human nga gikabangga ang truck alas-5:05 sa hapon sa milabay’ng adlaw sa may Daang Maharlika Highway, Km 13 Panacan ning syudad sa Davao.
Sa inisyal nga imbestigasyon sa Sasa Police Station, gisubay sa trisikad ug truck ang Daang Maharlika highway, gikan sa norteng bahin ug padulong kini sa south. Ug pag abot sa km. 13 Panacan, atubangan sa Fosy trucking compound, niliko ang trisikad padulong diin nagsubay ang truck hinungdan nga naigo kini ug nalagpot.
Gumikan sa kakusog sa impak, patay diha dayon ang trisikad driver nga nailang si Runny Day Mangubat, 33 anyos, minyo ug residente sa km. 13 Panacan.
Samtang nakaangkon sab og mga pangos ang mga pasahero nga nailang sila Raciel S. Carza, 27 anyos, nga taga- Waling-waling Buhangin, Cherry Joy C. Adolfo, 26 anyos, ug residente sa Prk. Sili, Brgy. Gredu Panabo City ug Charis Zuñiga, 25 anyos, nga taga- Sarmiento Village Panacan.
Samtang ang driver sa maong truck nailang si Rene Jr. Porinas Davis, 43 anyos, nga taga- Ilang Davao City.
Gikustodiya sa otoridad ang driver sa truck alang sa saktong disposisyon samtang ang patay’ng lawas sa trisikad driver ang anaa sa Rivera Funeral Homes Km. 13 Panacan Davao City.
