Ginkilala ang biktima kay Jesril Fantiga, 23-anyos, single kag residente sang Sitio Ilawod, Brgy. San Rafael, Dumalag samtang ang ginatudlo suspek amo si Reynold Abisan, 24-anyos, single kag residente naman sang Sitio Pamantawan, Brgy. Mianay, Ivisan apang temporaryo nga nagapuyo sa Amado Lim Compound, Brgy. X, Roxas City.
Suno sa biktima samtang nagalimpyo siya sang iya tricycle, ginpalapitan ini sang suspek nga yara sa impluwensya sang makahulubong nga ilimnon kag may nagpatunga sa ila nga pagbinaisay.
Ginkakibot nalang sang biktima sang hinali siya ginbuno sang suspek sa idalom sang iya liog gamit ang 13 ka pulgada nga kutsilyo. Gilayon naman nga nagpadulong sa Capiz Emmanuel Hospital ang biktima para sa nagakaigo nga pagbulong.
Samtang, natigayon naman nga nadakpan sang mga nagresponde nga tanod ang suspek kag gin-turn over sa Roxas City Police Station agud mapasakaan sang nagakaigo nga panumbungon. | Judy Ann Juare