Sangka may mabinueawanon euman nga taguipusuon nga Aklanon ro nagpakita it katampad matapos kara nga ibalik ro anang nakita nga bag nga may sueod nga kwarta.
Ginkilaea ro makabig nga huwaran nga Aklanon nga si Dario Rico, sangka tricycle driver ag taga Brgy. Libas, Banga, Aklan.
Ro anang nakita nga bag hay may sueod nga cellphone, wallet, driver’s license ag cash nga P3,000.
Owa raya nagduha duha ag insigida nga gindaea ro bag sa Kalibo MPS para i-turn over.
Mabahoe man ro pagpasaeamat it tag ana nga si Krismae Puod nga taga Libang, Makato ag naibalik kana ro anang bag. // ANN DESLENE SALAZAR
