Arestado ang isa ka 36-anyos nga tricycle driver matapos ginkasahan sang drug buy bust operation sang mga otoridad sa Brgy. Punta Tabuc, Roxas City takna ala 1:02 kahapon sang Miyerkules, Hulyo 12.
Ginkilala ang nadakpan kay Dionesio Andres Jr., residente sang Brgy. 9, sining syudad kag ginakabig nga High Value Indibidual (HVI) sa Provincial Level.
Nabaklan si Andres sang police poseur buyer sang 1 ka sachet sang ginasuspetsahan shabu nga nagabalor sang P6,000.
Narekober pagid sa paghinakop ni Andres ang 8 ka plastic sachets sang ginasuspetsahan shabu, sigarilyo, coin purse, kag isa ka keypad nga cellphone.
Nagabug-at tanan sang 25 gramos ang nakumpiskar nga droga kag nagabalor sang P170,000.
Magapangatubang sang kaso nga paglapas sa RA 9165 ukon Comprehensive Dangerous Drugs Act of 2002 si Andres. Sa karon, yara na ini nagapabilin sa kustodiya sang Roxas City PNP para sa nagakaigo nga disposisyon. | Judy Ann Juare
