Nataban sang wala makilala nga suspetsado ang kapin P92,000 nga balor sang alahas matapos ginsulod ang isa ka remittance center sa dako nga mall sa may bahin sang Barangay Baybay, Roxas City.
Sandig sa ginpabalhag sa Roxas Component City Police Station sang teller nga ginkilala kay Jacellou Porras, 29-anyos, residente sang Sitio Pili, Brgy. Dinginan sining syudad, ginpahayag sini nga sadtong Hulyo 4, nadiskubrehan nila sa ila inventory nga nadula ang 18 Karat Gold nga kulintas nga nagabug-at sang 28.5 grams nga nagabalor sang P92,039.
Nakit-an sa CCTV footage, ang isa ka babayi nga pasekrito nga ginkuha ang kulintas samtang ginaistorya ini sang teller bilang customer kag madasig nga naguwa.
Sa karon, padayon pa ang imbestigasyon sang kapulisan sa nasambit nga insidente.
