GIHATOD sa usa ka traysikel drayber sa buhatan sa traffic enforcement unit kon TEU-GenSan ang usa ka brown nga pitaka nga may sulod nga kwarta nagkantidad sa P2,800.
Giila ang drayber nga si Marjun Dela Cruz, hamtung ang panuigon. Sumala niini kaniadtong Nobyembre 28 sa buntag aduna siyay gisakay nga babaye nga pasahero gikan sa plaza paingon sa usa ka mall sa J.Catolico, Barangay Lagao ug nabilin ang pitaka sa traysikel. Hinungdan nga iyaha kining giturn-over sa kapulisan aron mabalik sa tag-iya nga usa ka sekyu.
Gidayeg sab ni PMajor Pauya, hepe sa TEU si Dela Cruz sa iyahang gibuhat ug nanghinaot ang opisyal nga ang nahisgotan maoy mahimong modelo sa ubang drayber luyo sa mga nagakahitabo nga insidente sa pagpangbastos asa lambigit ang mga traysikel drayber. Gani, sa rekord sa TEU lima na ka babaye ang nangayo og tabang sa kapulisan human gibastos sa mga drayber, pipila niini ang nasikop samtang ang uban padayon pang gipangita sa kapulisan. I Enamie Mogpon
