Nag-atubang na sa kasong maykalabotan sa ilegal nga droga ang usa ka empleyado sa gobyerno ug laing duha ka kauban human nadakpan sa gilusad nga drug buy bust operation sa mga sakop sa
Davao Del Sur Provincial Office sa PDEA Regional Office XI kauban ang Davao Del Sur Police Provincial Office, 1104th Regional Mobile Force Battalion ug Digos City Police Station.
Natigayon ang maong operasyon sa milabay nga gabii sa Purok Laminusa, Barangay Cogon, Digos City, Davao del Sur.
Naaktuhan nga namaligya og ilegal nga druga ang suspek nga nailang si alyas Alfahad, 34 anyos, minyo, Job Order Personnel sa Local Government Unit sa Digos City.
Atol sa maong operasyon, kalakip nga nadakpan ang drug den employee nga si alyas Hadsmina ug drug den visitor nga si alyas Anjelou.
Nakuha sa posisyon sa mga dinakpan ang kapin kon kulang 13 gramos sa gituohang shabu nga dunay estimated value nga Php 88,400.00, ug drug paraphernalia.
Kasamtangan, tingkagol na sa prisohan ang mga dinakpan ug kasong paglapas sa RA 9165 kon Comprehensive Dangerous Drugs Act of 2002 ang gipasaka batok sa mga suspetsado.