Madinaeag-on nga naaresto it Bingawan Municipal Police Station ag Iloilo Police Provincial Office, Drug Enforcement Unit ro sangka 47 anyos nga eaeaki sa sangka buy-bust operation ag nakumpiska ro P102,000 nga balor it suspected shabu sa mismong residente kara sa Purok 7, Barangay Poblacion, Bingawan, Iloilo.
Ginkilaea ro subject nga si Joenard Briones y Babon, ag residente it nasambit nga lugar.
Suno kay Police Lieutenant Ryan Christ Inot, Acting Chief of Police it Bingawan Municipal Police Station, kaabuan sa illegal nga transaksyon ni Briones hay nagakatabo sa baeay kara.
Inaresto raya matapos magbaligya sa sangka poseur buyer it sachet nga may suspected shabu kabaylo it buy-bust money.
Nasayuran nga dati rayang nagaistar sa Tapaz, Capiz ag nagsaylo sa Bingawan ku 2016.
Si Briones hay sangka ‘tokhang surrenderee’.
Ro kabilugan nga bug-at it nakumpiska nga iligal nga droga hay kapin sa 15 gramo nga ginaboebanta nga may balor nga P102,000.00.
Sa kustodiya eon ro suspek it Bingawan Municipal Police Station ag magapangatubang sa kasong pag eabag sa Republic Act 9165 o Comprehensive Dangerous Drugs Act of 2002. / ANN DESLENE SALAZAR
