Reymund Titong
KABANKALAN CITY, Negros Occidental — Tatlong opisyal ng militar na dating nakatalaga sa Negros Occidental ay kinilala dahil sa kanilang kahanga-hangang pagsisikap na mapaunlad ang komunidad ng Madaja sa lungsod ng Himamaylan.
Si Lieutenant Colonel Van Donald Almonte, Captain Eduardo Rarugal, Jr., at Captain Efren Reyes, Jr., ang mga kinilala sa pagbubukas ng ika-38 Negros Trade Fair noong Setyembre 17 sa Glorietta Mall sa lungsod ng Makati.
Ang tatlo, na dating nakatalaga sa 94th Infantry Battalion sa Ayungon, Negros Oriental, ay naging mahalaga ang papel sa tagumpay ng “Tikang” project, isang inisyatibo na pagpapaunlad ng komunidad na nakatuon sa pagbibigay kabuhayan.
Ang proyekto, na pinamunuan ni Almonte bilang dating komander ng batalyon, ay humubog sa kasanayan ng komunidad sa paggawa ng mga banig at iba pang mga produkto na gawa sa tikog.
Ang “Tikang,” isang salitang Hiligaynon na nangangahulugang “hakbang,” ay akmang naglalarawan sa layunin ng proyekto: tulungan ang komunidad na makagawa ng makabuluhang mga bagay at hakbang patungo sa mas progresibo na kinabukasan.
Ang mga opisyal ay naging mahalaga rin sa pagtatatag ng Madaja Handweavers Association (MAHAWA). Sa tulong ng Association of Negros Producers (ANP) at iba pang mga grupo, nagbigay sila ng pagsasanay, pinahusay ang kalidad ng mga produktong tikog, at ikinonekta ang mga manghahabi sa mas malalaking merkado, na nagpalago sa kanilang kita.
Mismong si ANP president Arlene Infante kasama si ANP treasurer Bing Gonzaga at 303rd Infantry Brigade Commander Brigadier General Orlando Edralin ang nagbigay ng pagkilala sa tatlong mga opisyal.
Ayon kay Sybel Nobleza, external affairs manager ng ANP, “Nakita namin ang kahanga-hangang kasanayan at potensyal ng mga miyembro ng komunidad. Kaya tinulungan namin silang magkaroon mga oportunidad upang makapagtayo ng asosasyon upang magkaroon sila ng magandang kinabukasan para sa kanilang sarili at sa kanilang mga pamilya.”
“Ang mga manghahabi, na dati hirap sa pagkakaroon ng kabuhayan, ngayon ay mayroong pangmatagalang hanapbuhay, na nagpapahintulot sa kanila na suportahan ang kanilang mga pamilya at mapag-aral ang kanilang mga anak,” dagdag pa niya.
Ang tagumpay ng proyekto ay nagsilbing gabay para sa ibang mga komunidad sa buong probinsya, na ipinapakita na kahit sa pinakamahirap na lugar, posible ang pagbabago sa pamamagitan ng klarong bisyon, pamumuno, at dedikasyon.
“Sa pamamagitan ng pagbibigay oportunidad sa mga komunidad at pagbibigay sa kanila ng pangmatagalang kabuhayan, maaari tayong lumikha ng mas progresibo na kinabukasan para sa lahat, at gawing makabuluhan ang kanilang mga kwento,” ayon kay Nobleza.* -BNFM Kabankalan
