BALETE, AKLAN—Sa paghinakop eon makarun it Balete Municipal Police Station ro tatlong eaeaki matapos mag eapas sa ginapatuman nga COMELEC liquor ban sa bisperas it Barangay ag Sangguniang Kabataan elections.
Base sa report, samtang nagapatigayun it pagpatrolya ro mga personnel it Balete MPS sa pagpamuno ni Officer-in-Charge, Police Major Bryan Alamo sa Sitio Kanyugan, Brgy Feliciano, Balete hay naaktuhan nanda mismo ro nasambit nga mga eaeaki nga naga inuman sa kilid it daean.
Bangud kara, insigida nga inaresto ro owa eon ginpangaeanan nga mga eaeaki nga magapangatubang sa kaso.
Ro liquor ban hay sambilog sa mga istratehiya nga ginapatuman it COMELEC agud masiguro nga maging maayos ag matawhay ro pagpatigayun it eleksyon makarun nga dag on.
