Arestado it Malay PNP ro mag asawa bangud sa pag eabag sa ginapatuman nga liquor ban kaangot sa Barangay and Sangguniang Kabataan Elections (BSKE) 2023.
Ro mag-asawa nga tag ana it sangka bar ag restaurant sa isla it Boracay hay naaresto it kaaganhun ku Oktubre 29 sa pag eabag sa Liquor Ban sa sangka establisyemento matapos mapaseawan nga magpakita it Certificate of Exemption halin sa COMELEC.
Ginpaandaman it kapulisan ro nasambit nga mag asawa ag staff it bar ag restaurant pero owa nanda ginsapaka ro nasambit nga warning.
Suno kay PLTCOL Dainis O Amuguis, Acting Chief of Police, nagpadaea imaw it sueat sa mga establisyimento sa banwa it Malay ag ginmanduan ro anang mga tawuhan nga magpatigayun it roving agud padumdumon ag taw an it paandam ro mga residente, turista, ag establisyimento angot sa pagpatuman it Liquor Ban.
Samtang, gindaea eon ro mag asawa sa Malay Police Station para sa documentation ag nagakaigu nga disposisyon. // ANN DESLENE SALAZAR
