LEGAZPI CITY – Igwa na nin kasimbagan an Tabaco-Legazpi Transport Cooperative (TALETRANSCO) sa mga overloading issues sa modern jeepneys kaini na gikan sa mga commuters.
Sa intrevista kan Brigada News FM Legazpi sa chairman kaini na si Alex Bañares, sinabi niya na ngunyan niya sana nadangog an reklamong ini huli ta wara pa ki nakakaabot na siring kaini sa saindang opisina.
An reklamo kaya, an mga modern jeepneys kan TALETRANSCO, nagpapasakay pa nin pasahero dawa paranuon na kaya napipiritan sindang magtirindog sa laog kan lunadan.
An simbag man ni Bañares, basado sa modernization program kan gobyerno, idinesenyo an modernized jeep units na mahiwas asin komportable sa laog kaya pigtutugutan sinda na mag-akomodar ki mga standing passengers.
Segun saiya, pig-uutob ninda an mga guidelines na nasa sa irarom kan Philippine National Standard Specification.
Sa katunayan, an saindang units, igwa su boot ki certificate of compliance na hale sa Department of Transporatation.
Kaya sa mga nagsasabi manungod sa isyu, ini an simbag niya: allowed sinda huli ta an nasambit na units, gari man sana MRT na nag-aakomodar nin standing passengers orog na kun rush hours.
Alagad, mas maray su boot kun an mga siring na reklamo, iderekta sa saiya o sa saiyang opisina o kaya mag-apod sa sainda nganing tulos ining maaksyunan.
