Patay ang usa ka trabahante sa security agency human giunay matud pa sa iyang kauban sa Prk. 6 Tagbaros Maco Davao de Oro kagahapon sa udto.
Sa report sa Maco Municipal Police Station giila ang biktima nga si Joel Lauder, monitoring sweeper sa Multi Shield Security Agency ubos sa Apex Mining Company samtang ang suspek si Jovani Locanias nga matud pa “buddy” ra gihapon sa biktima sa iyang trabaho.
Subay sa testimonya sa usa ka saksi nagamotor ang biktima sa dihang kalit kining gipusil makadaghan sa suspek kon asa naigo kini sa managlahing parte sa lawas nga miresulta sa iyang kamatayon.
Una na usab matud pa gipangita ni Locanias ang biktima atong adlawa base usab sa usa pa ka saksi sa nasangpit nga krimen.
Dumot ang nakitang motibo sa otoridad sa nasangpit nga hitabo diin gipangita na karon ang suspek nga misibat human sa hitabo. BNFM-Davao
