Gipamugos ni Presidential Assistant for Eastern Mindanao Leo Tereso Magno nga walay kamatuoran ang migawas nga balita nga gisuspendi ang multi-billion bridge project sa Davao City-Island Garden City of Samal.
Sa pahayag sa kalihim, iya sumala pang gitawag si DPWH Undersecretary Emil Sadain aron nga i-verify kung tinood nga gisuspendi ang maong proyekto.
Nakumpirma niini nga dakong bakak ang maong mikatag nga taho, gani prayoridad sa administrasyong Marcos ang maong proyekto.
Samtang, gipahimangnuan ni Magno ang mga opisyal nga dili magpataka og pagawas og mga dili beripikadong impormasyon ngadto sa publiko.
Dugang butyag usab ni Magno sa Dabawenyo nga iyang gipaningkamotan nga maduso ang Samal Island- Davao City Connector project gumikan dako ang matabang nini dili lamang sa duha ka lungsod kung dili sa tibuok Davao Region.
