Posible nga magapangatubang sang kaso nga frustrated murder kag anti-child abuse law ang step-father nga naglabo sa iya manak sa Brgy. Matinabos, Sigma, Capiz sang tinalikdan nga Miyerkules, Hulyo 10.
Suno kay Police Captain Dennis Los Bañes, hepe sang Sigma Municipal Police Station, nagaguwa sa ila maid-id nga imbestigasyon nga sa tion nga mahubog ang suspek nga si alyas “Maoy”, 43-anyos masami sini ginasakit ang biktima nga si alyas “Axel”, 8-anyos.
Dugang pa sang hepe, takna alas 6:30 sang aga sang tinalikdan nga Miyerkules, naabtan sang lola ang iya apo nga puno na sang dugo nga nagahigda sa ila kwarto kag may pilas sa ulo. Madasig nila ini nga gin-report sa kapulisan kag gindala sa Dao District Hospital ang biktima.
Natigayon naman nga madakpan ang suspek sa Brgy. Manggoso kag sa karun nagapabilin na sa kustodiya sang Sigma MPS para sa nagakaigo nga disposisyon. | Judy Ann Juare
