Ginkumpirmar ni Police Lieutenant Colonel Francisco Paguia Jr., hepe sang Roxas City Police Station nga iga-relieve kag halinon sa Capiz Provincial Police Office (CPPO) ang police personnel nga ginreklamo sa pagpanumbag kag pagpanaya sang armas-luthang sa duha ka persona sa Brgy. Bato Roxas City sadtong tinalikdan nga Hulyo 10.
Suno kay Paguia, nagapadayon ang ila imbestigasyon sa nasambit nga reklamo kag iya naman na-istorya ang amo nga pulis kag ginpa-surrender sini ang service firearms para man sa safety sang mga tag-reklamo.
Matandaan, sandig sa panaysayon sang mga biktima, nagbakal sang dulce sa tyange si alyas “Boy” sang hinali nalang ini ginpalapitan sang wala na ginhingadlan nga pulis kag ginhanaan nga sumbagon kag gintutukan sang armas sa dughan. Ginapahayag nga ginpitik sini ang gatilyo sang armas apang wala naglupok. Sunod naman sini nga gintayaan sang armas si alyas “Nonoy” nga nagapungko sa tricycle ni alyas boy. Bangud sa kahadlok sang mga biktima ginpakamaayo nalang nila nga maghalin sa lugar. | Judy Ann Juare
