LEGAZPI CITY – Ikanamundo kan sarong stand-up comedian, an pagsingil saiya ki sarong tricycle driver ki nasa kantidad 1,500 pesos para sa 40 minutos na biyahe hale sa Tabaco Port pasisiring sa Bicol International Airport (BIA) kasusaro sana.
Sa intrevista kan Brigada News FM Legazpi kay Mango Reyes, sinabi niya, huli sa pangyayaring ini, nangangapodan siya na magkaigwa ki anunsyo para a mga taripa sa probinsya nganing magin aware man an mga turista.
Segun saiya, dakol na siyang mga dinuman na lugar alagad ngunyan sana siya nakaeksperyensyar na singilon ki arog kaitong kantidad.
Sinabi pa niya, kaya man siya nag-post sa Facebook huli ta gusto niyang maaraman kun arog kaini an singilan digdi sa probinsya, orog na ta dakol na mga turista an minapasiring sa Albay, asin makamundo sana kun arog man kaini an maeeksperyensya.
