‘DILI undangan ang imbestigasyon hangtud dili masulbad ang kaso.’ Kini ang gipasalig ni Col. Jemuel Siason, police provincial director sa South Cotabato sa pagpusil patay kang Atty. Juan Macababbad sa Surallah, South Cotabato.
Gipaklaro ni Siason, nga ang kapulisan ang first responder sa insidente ug bisan anaa ang NBI, padayun gihapon nga buhaton sa kapulisan ang ilang trabaho aron mahatag ang hustisya sa pamilya.
Nakig-alayun usab ang anak ni Macababbad ngadto sa kapulisan ug kung makatigom og testimonya sa mga nakakita sa insidente, ilaha usab iduso ang kaso.
Sa inisyal nga imbestigasyon, nag-match matud pa ang basiyo sa armas nga nakuha sa crime scene sa ubang shooting incident sa South Cotabato.
Nagtuo si Siason nga posibleng hired killer ang mipusil kang Macababbad ug gusto nilang masayran kinsa ang nagpaluyo sa pagpatay. Usa lamang sa gitutokan nga motibo ang trabaho ni Macababbad nga subay sa impormasyon, nakadawat og bahad sa kinabuhi bag-o pa ang pagpamusil.
