Pilas sa duha ka paa ang naangkon sang 19-anyos nga soltero matapos ginluthang sang iya kaupod sa bilasyonan sa Brgy. Cabugcabug, Pres. Roxas, Capiz takna alas 12:20 kaina sang kaaganhon subong nga adlaw sang Sabado, Agosto 12.
Ginkilala ang biktima kay Jonard Cesar, samtang ang suspek amo si Gerald Mejica, 32-anyos, lunsay mga residente sang nasambit nga Barangay.
Sandig sa imbestigasyon sang Pres. Roxas Municipal Police Station, samtang yara sa bilasyonan ang biktima kag suspek, hinali lang may nagpatunga nga indi pag-intindihanay sa duha.
Ginapahayag nga ginluthang ni Mejica si Cesar sang makaisa ka beses sa paa gamit ang wala matumod nga armas-luthang kag madasig nga nagpalagyo sa indi mahibaluan nga direksyon.
Ginpadangat naman sang iya himata si Cesar sa Bailan District Hospital para sa nagakaigo nga pagbulong. Sa karon, padayon pa ang hot pursuit operation sang mga kapulisan sa nagpalagyo nga suspek. | Judy Ann Juare
