Naguba ang puturo sang 18-anyos nga lalaki matapos ginserbihan sang warrant of arrest sa kaso nga rape sa Barangay Daan Banwa, Tapaz, Capiz.
Ginkilala ang akusado kay Herjhun Palapera Ga-as, residente sa nasambit nga lugar.
Ang mandamiento de aresto sa kaso nga qualified rape ang gin-isyu kag pirmado ni Honorable Judith D. Orendain-Tonogbanua, Presiding Judge, RTC 6, Branch 20, Mambusao, Capiz napetsahan Hunyo 26, 2023.
Natigayon nga maaresto si Ga-as takna alas-5:30 biyernes nga adlaw pinaagi sa gintingub nga pwersa sang Tapaz PNP, 2nd Capiz Provincial Mobile Force Company, kag Capiz PIU.
Sa karon, nakahunong sa Tapaz MPS ang akusado para sa nagakaigo nga disposisyon samtang wala naman sang piyansa nga ginrekomendar ang korte psra sa temporaryo sini nga kahilwayan. | KMD Gicalde
