PUNUAN na ang mga ospital sa GenSan, mapribado o publiko man kung hisgutan ang pasyente sa COVID-19.
Kini ang gibutyag ni Dr.Jovino Aquino, presidente sa Socsargen Internist Society nga dili na maka-akomodar ang mga pasyente sa COVID-19 tungod 14 ka adlaw ang igahin ug ginahulat kung may ma-discharge gawas pa nga ang silingang mga lugar, sa GenSan pa gidala ang ilang pasyente tungod punuan usab sila didto sama sa South Cotabato.
May rekomendasyon na ang Socsargen Internist Society sa mayor sa syudad nga dugangan ang isolation facility alang sa mild ug assymptomatic tungod halos punuan na ang mga RHU isolation. Gipa-activate na usab ang partnership sa RHU alang sa teleconsultation kung kinahanglan ang ilang assistance ug testing capacity.
Giangkon ni Dr. Aquino, sobra ka taas ang positivity rate sa COVID-19 sa GenSan sa 29 percent hinungdan nanawagan sa publiko ipatuman sa husto ang mga non pharmacological interventions tungod sobra na gyud nga gikulang ang mga nurses ug staff gawas sa mga mechanical ventilator ug ubang kahimanan.
