NAG-IYAHAY na sa pagpanghipos ang mga vendors sa oval-plaza sa Gensan, ang ubang mga baligya sama sa gamit, ug mga sanina nakabalot na sa selopin, ug aduna usab gipangsulod sa karton.
Naabtan sa news team ang mga anak Baironisa, gabie sa adlawng Huwebes nga nagtinabangay sa paghipos sa ilahang mga baligya tungod ang LGU-Gensan nagmando na matud pa nga kutob lang sila Byernes, Enero 5 mamaligya sa lugar ug kinahanglan mahinlo na ang palibot.
Luyo niini, nagpasalamat sab ang vendor nga si Johaimen Dimaluna sa sobra usa ka bulan nga pagtugot sa LGU kanila nga makapaninda, ubay-ubay matud pa nga mga kostumer ang midagsa rason nga sila nakaginansya og halos trenta porsyento. Sa ulahing gabie nakaapas pa sa pagpamalit ang pipila ka kostumer.
Gipaniguru sa mga vendors nga sa adlawng dominggo, Enero 7 malimpyo na ang ilahang mga pwesto. Nasayran nga nagsugod sa pagpaninda ang mga vendors sa nahisgotang lugar kaniadtong Nobyembre 28 dungan sa paskuhan sa Gensan 2023. I Enamie Mogpon
