Priso sa Jamindan Municipal Police Station ang isa ka Street Level Individual (SLI) matapos nabaklan sang shabu sa ginkasa nga drug buy bust operation sang kapulisan sa Brgy. Agambulong takna alas 5:37 kahapon sang Domingo, Mayo 19.
Ginkilala ang suspetsado kay alyas “Hapon,” 34-anyos, laborer kag residente sang Brgy. San Vicente, Jamindan.
Nakuha sa iya paghinakop kag kontrol ang apat ka sachets sang ginasuspetsahan shabu lakip na ang nabakal sang police poseur buyer, P1,500 nga buy bust money, coin purse kag isa ka unit sang motorsiklo.
Ginabanta nagabug-at ang 1 gram ang nakumpiskar nga droga kag may standard drug prize nga P6,800.
Sa karon, natalana na ini nga pasakaan sang nagakaigo nga panumbungon. | Judy Ann Juare
