ABLIHAN sa simbahan ang pultahan alang sa nagpadayong vaccination program sa gobyerno. Matud ni Dr. Karl Ivan Igrobay, deputy vaccination officer sa City Health Office (CHO) sa pag-atubang niini sa sesyon sa konseho Martes.
Kini aron makaangkon og booster shots ang mga indibidwal nga nakakuha na og primary series sa Covid-19 vaccination. Abli ang pipila ka simbahan sa siyudad alang sa vaccination gikan Setyembre 1 hangtud na sa Oktubre 1,2022. Gawas niini, magbutang usab og vaccination sites sa transportation terminal gikan Setyembre 5- 18,2022.
Nagpadayon usab ang ‘house- to-house’ vaccination nga nagsugod atong Agosto 8 ug molungtad hangtud 21. Magbutang usab og sites sa mga tulunghaan sugod Agosto 22- Setyembre 4, gikan alas-8 sa buntag hangtud na alas-5 sa hapon.
Dugang ni Dr. Igrobay, dungan sa pagpalapad sa vaccination coverage, himoon usab ang drive thru vaccination ug “bakuna nights. Samtang nagpabilin ang vaccination sites sa mga malls, Rural Health Units ug sa vaccination centers sa Barangay Lagao.
Tumong niini, dugang ni Dr. Igrobay ang mahatagan og booster dose ang 180,000 katao nga una nang nakadawat sa primary series sa bakuna. Sa datus sa LGU, naa pa lang sa 76,597 ang nakakuha og unang booster dose gikan sa 407,006 nakakuha og unang duha nga Covid-19 vaccine.
Sa karon ang GenSan ang dunay 100 active Covid-19 cases; 659 death toll ug 17,669 gikan sa kinatibuk-ang 18,439 Covid-19 case gikan pagsugod sa pandemya. I Richel Gubalani
