Patay ang isa ka menor de edad nga siklista matapos naaksidente sa Brgy. Batabat, Maayon, Capiz takna alas 2:30 kahapon sang Dominggo, Setyembre 3.
Ang wala na ginhingadlan nga biktima ang naga-edad sang 17-anyos kag residente sang Brgy. Timpas sa banwa sang Panitan.
Sandig sa imbestigasyon sang Maayon Municipal Police Station, samtang nagamaneho sang iya mountain bike ang biktima sa pabulhugon nga bahin sa Sitio Silab padulong sa Maayon proper pag-abot sa kurbadahon nga alagyan aksidente ini nga nadulaan sang kontrol sa pagmaneho rason nga bumunggo sa concrete barrier nga nahamtang sa higad sang karsada.
Bangud sa natabo, nag-angkon sang patal nga pilas sa sag-ang ang biktima nga gintunaan sang iya gilayon nga kamatayon.
Ginpadangat pa sang Maayon Emergency Response Team ang biktima sa Bailan District hospital agud i-revive apang gindeklara sang doktor nga dead on arrival. | Judy Ann Juare
