Nakumpiska sa mga sakop sa Los Amigos Police Station ang kapin usa ka milyon kantidad sa gituohang shabu atol sa drug buy-bust operation, alas 12:00 sa gabii, Mayo 23, 2024 sa Purok 5-A, Brgy. Los Amigos, Tugbok District ning syudad.
Giila sa kapulisan ang dinakpan nga si alyas Erp, 60 anyos, top 1 drug watchlist sa syudad nga taga Purok 9, Brgy. Tienda Aplaya, Digos City.
Nasikop matod pa ang suspek human kini napalitan og usa (1) ka pakete sa gidudahang shabu sa operatiba nga nagpakaarun ingnung poseur buyer.
Atol sa operasyon, nakumpiska gikan sa nahisgutan ang laing gidak-on nga pakete sa shabu. Ang napalit ug nakuha sa suspek mubalor sa kinatibuk-ang Php1,009,400.00.
Balhog na karon sa Los Amigos Police Station ang maong dinakpan ug gihikay na ang pagpasaka og tukmang kaso kalabotan sa iligal nga droga batok kaniya.
