Naniniwala si Senator Joel Villanueva na ang sinasabing ‘big boss’ ng ilegal POGO sa bansa ay si Duanren Wu, isa umanong dating Chinese police, at ang incorporator ng Whirlwind Corp.
Ito ay matapos pangalanan ng opisyal mula sa Presidential Anti-Organized Crime Commission (PAOCC) si Huang Zhiyang bilang “boss of all bosses.”
Si Huang ay isa sa mga co-incorporators ni Alice Guo sa Baofu Land Development.
Ayon kay Villanueva, hindi siya naniniwalang si Zhiyang ang big boss ng POGO, at tila si Duanren Wu ang talagang notorious.
Aniya, ‘He is the one running the show,’ at posibleng tunay na big boss na kinatatakutan.
Siya umano ang pinaka-mastermind ng violent acts, pangto-torture, pangingidnap, at iba.
Binigyang-diin ng senador na kung may kinatatakutan si Guo, mukhang si Duanren Wu ito.
