Nagpaabot ng pagbati si Senador Christopher Bong Go para kay pinay weightlifter Hidilyn Diaz matapos nitong masungkit ang kauna-unahang gintong medalya sa Olympics.
Sa isang pahayag sinabi ni Go na nakikiisa siya sa buong sambayanang Pilipino sa pag-saludo sa husay at galing ni Diaz.
Naniniwala ang Senador na ang pagsisikap, disiplina at tagumpay ni Hidilyn ay magbibigay inspirasyon sa lahat, lalo na sa mga kabataang nagnanais na maging atleta.
Ang makitang itinataas ang bandila ng Pilipinas ayon kay Go ay nagbibigay din ng lakas ng loob para manatiling lumalaban sa mga pagsubok ngayong pandemic.
Ayon kay Go, na bilang chair ng Senate Committee on Sports, ay nais niyang magpasalamat, sa ngalan ng lahat ng mga Pilipino, kay Hidilyn dahil sa pag-asa at karangalan na inihatid nito sa ating bansa.
