LEGAZPI CITY – Pigsiyerto kan Philippine National Police (PNP) Bicol na nagin matoninong an pag-obserbar sa nakalihis na Semana Santa 2024 sa rehiyon.
Ini sa ibong kan pagkakaarestar sa bomb maker kan Communist Terrorist Group (CTG) sa probinsya kan Albay kan nakalihis na Marso 28 asin an nangyaring engkwentro sa pagultanan kan tropa nin gobyerno asin CTG na ikinalugad nin sarong sibilyan.
Apwera man kaini, nagkapira man an binawian nin buhay durante sa mga insidente nin pagkalunod nagkapirang probinsya sa rehiyon, asin dugang pa an mga nairehistrong vehicular accidents.
Ikinamundo kan ahensya an siring na mga insidente, alagad pig-asegurar man ninda na ginibo ninda an saindang parte pag-abot sa seguridad kan publiko.
Mientrastanto, sa nagpapadagos man na summer vacation, pigsiyerto kan ahensya na padagos an saindang promesa sa pag-asegurar kan seguridad bako sana kan mga Bicolano kundi pati naman sa mga turista.
