Arestado ang isa ka security guard matapos nagapinalupok sang armas-luthang sa Barangay Rosario, Pilar, Capiz takna alas 11:30 kagab-i sang Huwebes, Agosto 8.
Ginkilala ang suspetsado kay Leomy Bartiso, 47-anyos, residente man sang nasambit nga barangay.
Sandig sa Pilar Municipal Police Station, nakabaton sila sang panawag gikan sa isa ka concerned citizen nga may yara sang gapinalupok sang armas-luthang sa ila lugar. Gilayon ini nga ginrespondehan sang mga pulis kag naaktuhan gid si Bartiso nga nagabitbit sang armas sa iya natuo nga kamot.
Narekober sa iya paghinakop ang isa ka unit sang smith and wisson caliber Magnum 357 revolver, isa ka bala sang 38 caliber, isa ka fired cartridge case sang .38 caliber nga nakasulod sa cylinder.
Sa karon, nagapabilin ini sa kustodiya sang Pilar MPS kag natalana nga pasakaan sang nagakaigo nga panumbungon. | Judy Ann Juare
