Angol ang usa ka sekyu human nakahanggab og daghang aso sa natigayon nga sunog sa VIP Hotel sa Velez St., Cagayan de Oro kaganinang buntag, Hunyo 23 ,2024.
Hinuon mapasalamaton ang Cagayan de Oro City Fire District tungod kay paspas nga napagawas ang 18 ka indibidwal gikan sa 9 ka kwarto, kinsa nagcheck-in niadtong tungura.
Matud ni CDO Fire District – Chief of Operation, Fire Senior Inspector Kyle Lauzon nga ang sekyu nga na suffocate sa aso, stable na ang iyang kahimtang human nahatagan gilayon og oxygen.
Samtang sa imbestigasyon niini, mga alas 5:46 sayo sa buntag sa dihang kalit adunay midilaab nga kalayo ug napalong kini alas 7:16 sa buntag.
Mokabat sa dul-an usa ka milyon o 900,000 pesos ang damyos sa pagkasunog sa portion sa lobby sa nahisgutang hotel.
Sa karon padayon pa gisuta sa mga otoridad ang hinungdan sa sunog. Samtang nagpasalig ang tagdumala sa VIP hotel nga abagahon nila ang gastos sa pagbalhin sa ilang mga customer ngadto sa lain nga hotel.
