Gikasuhan na kagahapon sa otoridad ang Dephian Security Agency, kinsa maoy nanag-iya sa 61 ka armas nga naharang sa Task Force Davao ug Calinan Police Station Checkpoint sa miaging Septyembre 25, 2021.
Matud kang Police Major Jake Goles, nasuta nga paso na ang License to Own and Posses Firearm (LTOPF) sa naasoy nga Security Agency.
Nasayran usab nga gi-revoke na sab ang License and Certificate sa maong ahensya nga nakadugang sa gipasang-at nga kaso.
Duha ka mga kaso ang gihikay nga gilangkuban sa RA 10591 Illegal Possession of Firearms and Ammunition ug ang RA 5487 Private Security Act.
Sa pikas bahin una nang napasakaan og kaso sa milabayng semana labot sa RA 9165 Comprehensive Dangerous Drugs Act of 2002 ug RA 10591 ang duha nga maoy nagdala sa mga armas nga giilang sila si Michael John Lantoria, 40 anyos, taga Cagayan de Oro City ug Sebastian Quiblat 61 anyos taga Misamis Oriental. BNFM-DAVAO
