BICOL – LIWAT na pinatanidan ngunyan kan Securities and Exchange Commission Bicol an publiko katakod kan paglaog kan anuman na investment urog ngunyan na panahon nin pandemya.
Segun ki SEC Bicol OIC Director Atty. Norma Tan-Olaya, naglangkaw an mga nareresibe nindang reklamo ngunyan na pandemic period laban sa mga investment scams na lakop sa internet o social media
Kadaklan soboot sa mga reklamo an laban sa mga online-based investment offers gamit an man iba ibang mga electronic cash transfer platforms para sa marikas na transaksyon.
Mantang nagpatanid man an SEC-Bicol kaugnay sa Ponzi Schemes na parating gamit sa mga fraudulent activities kun saen pigpopromesa an dakulang balik o kaya matangro nin instant cash na mayong kadipisilan sa laog nin halipot na panahon.
Sa siring na klase nin scheme, an mga naenot na investors an makakakuha nin dakulang balik o “high returns” na nagigikan man sa pondo na kinua gikan sa mga bagong nag invest.
Segun ki Olaya, an sarong indibidwal na nagdedelihensya nin siring na scheme an maliwanag na naghahabas nin kwarta nin iba.
Katakod kaini pig ingganyar kan SEC-Bicol an mga nabiktima nin mga siring na klase nin illegal investment schemes na makipagtabangan sa sainda asin mag file nin complaint-affidavit laman an detalyadong impormasyon dapit sa saindang naeksperiensyahan.
Pwediser soboot na magtulod nin reklamo an mga biktima nin scam sa saindang e-mail address na [email protected] asin mag apod sa saindang mga contact numbers na naka post sa saindang fb page para sa iba pang impormasyon asin kahaputan.
