LEGAZPI CITY – Sa mga nakalihis na eleksyon, wara man ki naobserbaran na mga isyu dapit sa delay kan pag-release kan honorarium sa mga paratukdo na nagsisirbi.
Ini an sinabi ni Dr. Santi Araña kan Legazpi City Schools Division Office katakod kan eleksyon sa Barangay asin Sangguniang Kabataan ngunyan na aldaw.
Nakasalalay su boot sa Commission on Elections (COMELEC) an pag-release kan saindang benepisyo huli ta sinda an may kontrol digdi.
Alagad, pigsisyerto ni Araña na makalihis ining eleksyon, makikipagkoordinar sinda sa COMELEC nganing maitao an honorarium sa mga paratukdo asin nganing dai sinda magparahalat nin haloy.
Mientrastanto, an mga paratukdo na masirbi, amay nang nag-andam para sa eleksyon asin amay man na nagpasiring sa mga presinto nganing ipreparar an lugar dara-dara man an mga election paraphernalia.
