Gipahibawo ni Cebu City Acting Mayor Raymond Alvin Garcia nga mohatag og school supplies ang kagamhanan sa dakbayan sa Sugbo sa gibanabanang 120,000 ka mga tinun-an sa pampublikong tunghaan sa elementarya ning syudad.
Gibutyag ni Acting Mayor Garcia nga sugdan karong adlaw sa Biyernes, Agosto 2, ang pagpang-apod-apod sa mga school supplies, nga maglakip sa bag, lapis, notebook, papel, ug uban pa, ngadto sa mga tinun-an sa 80 ka mga barangay sa dakbayan.
Dili ra hinuon karong Biyernes dayon humanon ang pagpanghatag ngadto sa 120,000 ka mga tinun-an apan buhaton kini sulod sa 30 ka mga adlaw.
Dugang pa ni Acting Mayor Garcia, nga kanunay nga andam ang tanang hingtungdang mga buhatan sa Kagamhanan sa Dakbayan sa Sugbo alang sa pagsugod na sa klase, sama sa Local School Board, Cebu City Transportation Office, Department of General Services, ug uban pa.
Giklaro hinoon ni Acting Mayor Garcia nga ang gipanghatag nga mga school bag ug school supplies alang lang sa mga tinun-an sa elementarya nga nag eskwela sa pampublikong mga tunghaan ug wala malakip ang mga nag eskwela sa pribadong mga tunghaan.//
