BICOL—Huli kan epekto kan African Swine Fever (ASF) labing nagsapar an hog industry bako sana sa Bicol kundi maging sa iba pang parte kan nasyun kun sain naeksperyensyahan an kakulangan sa suplay nin karneng orig.
Katakod kaini, igwa nang pigpaplantsang programa an Legazpi City Veterinary Office na katuyuhan na tabangan an mga hog raisers sa liwat na pagbangon asin maprotehiran an hog industry sa pag-atake kan swine virus.
Sa entrevista kay Veterinary Officer Dr. Emmanuel Estipona, ipinahayag kaini na nagkaigwa na sinda nin inisyal na pag-orolay manungod sa ilalansar na SAVE hog repopulation program.
S-sourcing of fund and hog breeder. Sa ngunyan suboot, igwa na sindang target breeder na babakalan.
A-Availment of loan for possible recipients and Adoption of all the guidelines on Bantay ASF program. Sa presente, igwa na suboot sindang nakauron na bangko para sa loan asin dakulang bagay ini para sa mga hog raisers huli ta warang collateral asin warang interes na kaipuhan bayadan.
V-Veterinary biosecurity officer sa mga barangay ngani na matabangan na mamantenir an compliance kan mga piggeries sa mga ipapasunod na guidelines.
E-Education o iyu an mga training na itatao smanungod sa biosecurity measures para sa mga resipienteng nag oorigan. Sigun ki Estipona, importante an programang ini ngani na maprotehiran an hog population kontra ASF urog na ngunyan na wara pang bakuna kontra digdi. || SLM
