GIPAALERTO karon sa health authorities sa Sarangani Province ang mga residente ug komunidad batok sa posibleng pagsaka sa kaso sa dengue tungod sa pag-ulan. Matud ni Dr. Arvin Alejandro, Sarangani health officer, gibantayan nila ang pito ka munipalidad sa probinsiya batok sa bahad sa makamatay nga sakit.
Gipatuman nila ang mga preventive measures sa mga rural health units ug barangays dungan sa pagtubag usab sa padayong problema sa Covid-19 pandemic. Sa rekord atong Hunyo 11 naa na sa 427 confirmed cases sa dengue ang natala sa Sarangani, tulo ang patay apan ubos ang kaso karong tuiga og naa sa 25% tandi sa 557 kaso nakalabay’ng tuig sa samang panahon.
Nakatabang sa pag-ubos sa kaso ang paglimit sa lihok sa mga residente tungod sa Covid-19 community quarantine measures. Nanghatag na ang LGU og 2,000 sachets sa larvicidal o non-insecticidal solution nga makatabang sa pagkontrola sa populasyon sa dengue-carrying mosquitoes. ( Richel Gubalani)
