Pilason ang driver sang motorsiklo kag backrider sini matapos aksidente nga nabunggu-an sang isa ka salakyan sa national highway sa Poblacion Ilaya, Cuartero, Capiz takna alas 8:30 kagab-i sang Huwebes, Mayo 30.
Ginkilala ang mga napilasan nga sanday Ariel Andres Jr., 31-anyos, negosyante kag alyas Mel, 17-anyos, lunsay mga residente sang Pob. Ilawod.
Samtang ang driver sang salakyan amo si Rose Ann Longilao, 36-anyos, negosyante kag residente sang Savana Subd, Oton, Iloilo.
Sandig sa imbestigasyon sang Cuartero Municipal Police Station, ginasubay sang salakyan ni Longilao ang dalanon sa Pob. Ilaya kag padulong kuntani sa Kalibo, Aklan. Ginapahayag nga nag-U-turn naman ang motorsiklo nga ginamaneho ni Andres rason sang pagbunggu-anay.
Bangud sa natabo, natumba ang motorsiklo kag nagkalahubog ang mga sakay sini nga gintunaan sang ila mga kapilasan sa kalawasan. Samtang ang driver sang salakyan ang wala nahalitan.
Gindala sang Cuartero Emergency Response Unit ang mga napilasan sa Dao District Hospital para sa nagakaigo nga pagbulong. Nag-surrender naman ang driver sang salakyan sa mga pulis nga nagresponde. | Judy Ann Juare
