NAGHANGYO ang labaw sa komitiba sa transportasyon ngadto sa media nga motabang sa pagpasabot sa katawhan kalabot sa proyekto nga underpass sa national highway gumikan daghan ang nagareklamo sa bagang duot sa trapiko.
Sumala kay Konsehal Dominador Lagare Jr. nga ang Traffic Management Plan nga underpass sa national highway nasayod daw kini nga daghan ang wala nakauyon sa mga harang nga naga resulta sa bagang duot sa trapiko ilabi na sa hapon.
Ang iyang hangyo nga magpailub lang ang mga tawo nga wala naanad sa ingon ana kadako nga proyekto unya tulo ka tuig mahuman ang trabaho sa contractor, unta masabtan daw sa katawhan ang rason kon ngano nga gihimo ang underpass sa lugar.
Sumala usab kay Kagawad Richard Atendido nga gibutang ang mga harang aron makita ug masayod ang katawhan nga adunay construction sa lugar, sa unang adlaw sa pag abli sa klase sa dihang nagdasok ang mga sakyanan kay ang uban wala pa nahibalo.
Alang kay Atendido normal ang sitwasyon basta may bag-ong proyekto aduna gayod traffic congestion nga mahitabo apan mao usab kini ang pinakarason kaniadto ngano nga naduso ang plano nga underpass.
Gipresenta usab ni Public Safety Office Acting Department Head Atty. Rowi Malayang ang plastada sa mga harang unya ang pagliko padulong sa Dacera Avenue, gipahibalo usab nga abli na ang bag-ong tulay sa Olaer Apopong isip alternate route sa mga sakyanan nga pasulod ug pagawas sa syudad. I Ver Diazon
