Pormal na nga ginlunsiyar ang City Ordinances and Regulations Enforcement (CORE) Unit sang lokal nga gobyerno sang Roxas City kadungan sang ginpatigayon nga Flag Raising Ceremony nga ginpangunahan mismo ni Mayor Ronnie Dadivas.
Ang nasambit nga hubon ang magatutok sa implementasyon sang mga lokal nga ordinansa nga ginpasar sang Sangguniang Panlungsod kag ipatuman sa idalom sang mandatu sang executive branch sa pagpanguna sang alkalde.
Para sa malinong, matahum, kag matinlo nga siyudad, pasangkaron ang pagpangdakop sa mga taglapas sang masunod nga mga ordinansa:
City Ordinance No. 066-2022 – Smoke-free and Vape-free Ordinance
City Ordinance No. 045-2022 – Baybayon ko, Limpyohan ko Ordinance
City Ordinance No. 079-2022 – Comprehensive Anti-Littering and Anti-Dumping Ordinance
City Ordinance No. 042-2002 – Traffic Code of Roxas City
Sa ginpatigayon nga press conference, ginpasiguro ni Dadivas nga mangin patas ang hubon sa implementasyon sang nasambitan nga mga ordinansa.
Nagpaidalom sa nagakaigo nga oryentasyon suno diri ang mga law enforcers agud mapatuman sang husto kag may legal nga basehan ang ila nga mandatu.
Mahibaluan nga ang madakpan nga mga taglapas ukon violators ang hatagan sang warning o paandam ukon paga-isyuhan sang citation tickets kun sa diin nasaad ang ila bayaran nga penalidad.
