LEGAZPI CITY – Pinautob na kan Albay Police Provincial Office (PPO) an reward system para sa mga nagkapirang myembro kan New People’s Army (NPA) asin Concepcion Criminal Gang (CCG).
Segun sa PPO, tinawan nin katuparan kan Albay Business Association kasabay ni dating PNP Bicol Regional Director PBGen. Westrimundo Obinque asin PPO Provincial Director PCol. Fernando Cunanan, Jr. an pagtatao nin pabuya sa mga tawong magigin susi sa pagresolbar sa kaso kan ginadan na pulis na si PSSg. Abel Sevilla pati man an pagkakaarestar asin pagsuko kan mga miyembro nin terorista.
Sa simpleng seremonya sa Albay PPO, personal na pig-abot ni Cunanan an promesang reward asin grocery packs sa mga informant sa paggadan kay Sevilla asin “Action Agents” kan CCG.
Ini man komo suporta kan PPO sa programa kan gobyerno na orog pang paigoton an kampanya kontra sa insurhensiya asin mga kriminal na grupo.
Piglalaoman man kan opisina na magin maray asin matoninong an mga lugar tanganing makahale sa pagtios asin makapag-enganyar pa na bayaan na ninda an saindang trabaho bilang mga terorista.
