BICOL – NANGAPUDAN ngunyan an pamayo kan Philippine Air Force sa mga interesadong aplikante na aprubitsaran an nagpapadagos nindang recruitment activity sa rehiyon.
Segun ki 2LT Jerry P Erplano Jr, Director for Administrations and Civil Military Operations kan PAF, pagkakataon na ini kan mga kwalipikadong Bicolano na maging parte kan saindang lado asin iyong mapano sa 1,777 Special Enlistment(SE) asin 183 Officer Candidate Course (PAFFOC).
Soboot dagos dagos an saindang nationwide recruitment kun saen para sa Bicol, bukas an pag ako nin mga aplikasyon nin hasta Abril kinse ngunyan na taon sa SM Mall sa ciudad nin Legazpi.
Bukas man ini sa mga Licensed Criminologist, PRC Licensed, asin igwang Civil Service Eligibles kun saen an igwang eligibility asin licensed criminologist an dai na required pang magkua nin Airmen Qualifying Exam asin diretso nang magpasa kan saindang aplikasyon.
Bukas an aplikasyon para sa mga mawot maging PAF Officer Candidate sa gabos na natural born Filipino citizen edad bente hasta bente singko anyos, degree holder, taas na dai mababa sa five feet mayong agom siring man physically asin mentally fit para sa military training.
Mantang mahihiling man an qualifications para sa special enlistment siring man an kumpletong listahan kan mga requirements sa social media pages kan Philippine Air Fore siring man sa facebook account kan Tactical Operations Group 5.
